Шымкентте автогаз 20 ₸, жанармай 5 ₸ қымбаттайды

Шымкентте ақпан айынан бастап автогаз 20 теңгеге, ал жанармай 5 теңгеге қымбаттайды. Бұл туралы бүгін қалалық энергетика және инфрақұрылымды дамыту басқармасы өкілдері мәлімдеді. Бұл өзгеріс енді мегаполисте сұйық отын тапшылығын азайтуға негіз болмақ және газ өңдеу саласына қосымша инвестиция салуға мүмкіндік береді. Сәуірден бастап ай сайын қала қажеттілігі үшін 10 мың тонна автогаз жеткізіледі. Бұл қазіргі сұраныстан 3 жарым мың тоннаға көп. Полиция Департаментінің мәліметі бойынша мегаполистегі 463 мың автокөліктің 66 мыңнан астамы сұйытылған газбен жүреді. Кейінгі екі жылда олардың саны 34 пайызға артқан. Сондықтан биылдан бастап осы қажеттілікке сай сұраныс қанағаттандырылатын болады. Қазір шаһарда 200-ден астам газ құю стансасы жұмыс істейді. Алайда 38 кәсіпкерлік субектісіне автогазды теңдей бөлу туралы түйткілді мәселе әлі толық шешілген жоқ.

Самат Мергенов, Шымкент қалалық энергетика және инфрақұрылымды дамыту басқармасы басшысының орынбасары:

Компаниялардың былтырғы 3 айының өткізген көлемін сол формулаға саламыз және сақтай алатын 38 компанияның қоймаларының көлемін енгіземіз. Формула автоматты түрде есептеп шығарады. Соны қабылдаймыз. Болды.

Ғани Қалмаханов