БҚО-нан 20 мың бас мал мен 1000 тонна ет экспортталған

Батыс Қазақстан облысында 20 мың бас мал мен мың тоннаға жуық ет жоғары бағамен экспортталған. Президент үкіметтің кеңейтілген отырысында осы саладағы түйткілді мәселелерді атап өткен.

Өңірде 44 мың басқа арналған 15 бордақылау алаңы бар. Шетелге тайыншаның тірілей салмақтағы келісі 1700 теңгеден өткізіліп жатыр. Ал жергілікті ет комбинаттары малды 1200 теңгеден алады. Тұқым түрлендіріп өсіргені үшін әр бастың келісіне төленетін 200 теңге субсидияны қосқанда, 1400 теңгеден шығып тұр. Шаруалар бұл бағаны арзансынады. Бірақ егер бағаны көтерсе, қайта өңделген ет тағамдары қымбаттап кетуі мүмкін. Мал алуға оңтүстік облыстардан сұраныс күрт артқан. Ірі қара әрі қарай Өзбекстан, Тәжікстанға жіберілуде. Ал ет комбинаттары Иран мен Ресейге қой етін экспорттайды.

Жасұлан Халиуллин, БҚО а/ш басқармасының басшысы:

Министрлік арнайы квота бекітеді республика көлемінде. Соңғы алты айға 80 мың басқа квота берілген. Соның аясында шаруалар экспортқа тікелей де мал шығарып отыр. Экспортқа тікелей шығып жатқан мал бағасының өзі де 1700-1750 теңге тірі салмақта. Бұл бір жағынан бордақылау алаңдары үшін де жақсы мүмкіндік.

Ардақ Мұратқызы