Енді 255 мыңнан асқан мобильді аударымдар тексеріле ме?

Мобильді аударымдарға лимит қойылады. Қазір оның шекті сомасын бекіту бойынша Мемлекеттік кірістер комитеті мен қаржы ұйымдары арасында қызу пікірталас жүріп жатыр. Ұлттық банк төрағасының орынбасары Берік Шолпанқұлов Сенатта осылай деді. Салық органдары бұған дейін 255 мыңнан асқан аударымдарды тексеру туралы ұсыныс айтқан. Айта өтейік, 3 ай қатарынан әр түрлі 100-ден астам адамнан төлем түскен азаматтардың шоты биылдан бастап бақылауға алынады.

Берік Шолпанқұлов, ҚР Ұлттық банк төрағасының орынбасары:

Мемлекеттік кірістер комитетінен ұсыныс түсті. Біз оны талқыладық. Қазір банк секторы оның техникалық жағынан мүмкіндігін қарастырып жатыр. Бұл олар мақұлдаған жағдайда қабылданады. Егер мақұлдамаса, әрі қарай тағы ұсыныстар болады.

Ұлттық банк өкілі қосылған құн салығына қатысты да түсінік берді. Оның сөзінше, салық өссе, бизнеске көбірек жеңілдік қарастырылады. Сондай-ақ, ол инфлияцияға да әсер етуі мүмкін. Алайда қандай мөлшерде екенін нақтыламады. Қазір Үкімет бюджет шығынын үнемдеп, кірісті арттыру бағытында жұмыс істеп жатыр.

Айя Мүтәлі