Ақмола облысында қысқы туризм нысандарының саны артып келеді

Ақмола облысында қысқы туризм нысандарының саны артып келеді. Себебі елімізде соңғы жылдары экотуризм мәдениеті дамып, табиғат аясында тынығатындар қатары көбеюде. Арқада жайдары жаздан гөрі ақ көрпесін жамылған қыс маусымы ұзағырақ болғандықтан, шипажайлар мен қонақүйлер таза ауада көрсетілетін қызмет түрлерін арттыруда.

Бурабай курортты аймағында қыстың қыраулы, қытымыр күндерінде де демалысты мазмұнды, әрі пайдалы өткізуге мүмкіндік мол. Сондықтан мұндағы 350 туристік нысанның шамамен 150-і жыл он екі ай қызмет көрсетуге көшкен. Демалушылар әсіресе орман ішінде таудан шаңғымен сырғанауды қызық көреді.

Ақдана Омарова, Петропавл қаласының тұрғыны:

Достарымызбен бүгін Бурабайға келіп қалып едік. Біздің демалыс өте жақсы өтіп жатыр. Шаңғы теуіп жатырмыз. Бурабайдың тамаша таза ауасында демалып, қызықты өткізіп жатырмыз. Бағалары өте қолжетімді. Барлығы ұнайды.

Спорт жабдығын 1 сағатқа жалға алу құны бұл жерде 6 мың теңге. Демалушылар бұл қолжетімді баға дейді.

Андрей Подгурский, Ақмола облыстық туризм басқармасының басшысы:

Қыс маусымында демалушыларды тарту үшін шипажайлар мен басқа да туристік нысандар бағаны түсіреді. Бұл курортты аймақта демалғысы келетіндер үшін өте тиімді. Спорт жабдықтарын жалға беруде де ақциялық жеңілдіктер болып тұрады. Жұмыс күндері 30-40, тіпті кейде 50 пайыз жеңілдікті пайдалану мүмкіндігі бар.

6 ай қыс болатын Ақмола өңірі қысқы туризмді дамытуға қолайлы аймақ. Бір қыста курортты аймақта, шамамен, 300-400 мың адам демалады. Туристік нысандар экотуризм, спорт, сауықтыру бағытында қызмет көрсетеді.

Бибінұр Әмірханқызы, тілші:

Отбасылық ойын-сауық саябағына келген әр адам құдды бір ертегі әлеміне енгендей күй кешеді. Кішкентай қонақтар үшін мұнда «Аяз ата резиденциясы» жұмыс істейді.

Жеңісбек Байсалбаев, кәсіпкер:

Қазақстандық Лапландия - әсіресе балаларды магнитше тартады. Сондықтан осында келіп демалатындар саны көп. Қыс басталғалы осында шамамен 3 мыңнан аса адам келіп демалып кетті.

Мұнда атқа отырып серуендеуге, шанамен сырғанауға, коньки тебуге жағдай жасалған. Сондай-ақ, беті мұзға айналған көлдің үстінде квадроцикл және қарда жүретін көліктермен жүйткіп, көңіл көтеруге болады.

Абай Нұркенұлы, Түркістан қаласының тұрғыны:

Мен өзім киелі Түркістан қаласынан келдім. Бізде Түркістанда қыс болмайды ғой негізінде. Мына жақта нағыз қысты сезініп, жақсы демалыс болып жатыр. Өзіміздің Қазақстанда жақсы жерлер бар ғой. Бурабай өте керемет жер. Орманның ортасы. Жақсы ұнап жатыр бізге.

Жалпы, Ақмола облысында қысқы туризм тек Бурабай ауданында ғана емес, Зеренді, Сандықтау, Ақкөл, Целиноград, Ерейментау және Қорғалжын аудандарында да қарқын алып келеді.

Бибінұр Әмірханқызы