Алматыда сауда-саттықты дамыту жолы талқыланды

Алматыда Еуразиялық Экономикалық Одаққа мүше елдердің үкімет басшылары бас қосты. Бұл – Еуразиялық кеңестің кезекті отырысы. Жиында кедергісіз сауданы дамыту, бизнес үшін қолайлы жағдай жасау және туристік әлеуетті ашу сынды маңызды мәселелер қаралды. Шараға Иран, Өзбекстан, Әзірбайжан делегациялары бақылаушы мемлекет ретінде келді. Премьер-министр Олжас Бектенов қатысушы ел өкілдерімен одақ шеңберіндегі өзара сауда-саттықты кеңейту жолдарын талқылап, экономикалық интеграцияның маңыздылығына назар аударды.

Олжас Бектенов, ҚР Премьер-министрі:

Қазақстан Президенті Қасым-Жомарт Тоқаев атап өткендей, бұл бірлестік өзара байланысты нығайтуда үлкен рөл атқарады. Әрі сауданы дамытуды сәтті жүзеге асырып жатқан маңызды алаң. Еуразиялық экономикалық одақ сыртқы жағдайларға тез бейімделуге мүмкіндік береді. Сондай-ақ, экономикамыздың бәсекеге қабілеттілігін арттыруға әсер ететін негізгі фактордың бірі.

Үкімет басшысы тұрақты экономикалық өсуді қамтамасыз ету үшін қолайлы бизнес орта қалыптастырудың маңыздылығын да атап өтті. Сондай-ақ, туристік саладағы ынтымақтастық жайын қозғады. Танымал бағыттар мен көрікті жерлер туралы бірыңғай ақпараттық ресурс құру бойынша жұмысты күшейту ұсынылды. Отырыс соңында қатысушылар ортақ жобаларды іске асыруға бағытталған бірқатар құжатқа қол қойды.

Ернұр Медет