БҚО-да тасқынға дайындалмаған әкімдерге сөгіс берілді

Батыс Қазақстан облысында тасқынға дайын болмай шыққан Орал қаласы мен Қаратөбе ауданының әкімдеріне сөгіс, басқарма басшыларына ескерту берілді. Өйткені қалада өзен жағалауындағы қорғаныс бөгеттері салынып бітпеген. Кейбірінің құрылысы басталмапты да. Ал соңғы екі жыл қатарынан ауылдарын су басқан Қаратөбе ауданында өзен жағалауы әлі бекітілмеген, су бұру каналы жөнделмеген. Өңірдегі барлық 102 гидротехникалық нысанның тек 36-сын теңгерімге алып, тапсырманы орындамаған облыстық табиғи ресурстар және табиғат пайдалануды реттеу басқармасының басшысына ескерту берілді. Ал облыстық төтенше жағдайлар Департаменті мұз жару іс-шарасына әлі конкурс өткізбеген. Жалпы өңірде Орал қаласы мен 9 ауданда су басу қаупі бар. Ылғал мөлшері төмен болғанымен, тоң қалың. Ақпанда жауын-шашын айлық мөлшерден көп болады деп болжанып отыр.

Тілеген Шапанов, «Қазгидромет» РМК облыстық филиалының директоры:

Ақпан, наурыз айларында түсетін жауын-шашын мөлшерін ескере отырып, бүгінде облыстың барлық ауданында су тасқыны қаупі бар. Жоқ деуге келмейді. Тоң қалыңдығы 10-60 см аралығында. Ең жоғары көрсеткіштер облыстың солтүстік-шығыс аудандары Бәйтерек, Бөрлі, Шыңғырлау, Теректі аудандарында.

Ардақ Мұратқызы