Түркістанда 12 қабатты алты үйдің тұрғындары қыс басталғалы жылуға жарымай отыр

Түркістанның «Жаңа қала» аумағындағы алты бірдей көпқабатты үйдің тұрғындары жылуға жарымай отыр. Бұл мәселе 5 жылдан бері қайталанып келеді. 550 пәтердің тұрғындары қыс басталғалы бүрсең қағып отырмыз, деп ашынады. Базбірі суық үйін тастап кетіп жатса, барар жері жоқтар пәтердің өзінде далада жүргендей киініп жүруге мәжбүр. Әсіресе балалар жиі ауыратын болған. Сондықтан әр бөлмеге электр пешін қойып, жылуға да жарыққа да артық ақша төлеуде.

Айбек Нышанбаев, пәтер иесі:

Үйге кірсеңіздер қазір екі жылыту үрлегіш құрылғы қойып қоямын. Тоңып бас киіммен ұйықтаймын. Ұят ештеңесі жоқ. Мың теңгеден ақша жинап, сантехникасын ауыстырдық. Бәрібір жылымайды.

Тұрғын үй құрылысын жүргізген түрік компаниясының өкілі пәтерлердің нақты неден жылымай отырғанын дөп басып айта алмады. Жылу барлық баспаналардың жертөлесіне келіп тұрғанымен, бізден кінәрат жоқ деп ақталды.

Хусейн Эффе, «Inter construction» компаниясының өкілі:

Мен не үшін жылымайтынына нақты жауабын бере алмаймын. Астындағы дүкендер бос болғандықтан, салқын болады. Сол үйді қалған үйлер секілді жылытуға болмайды. Оларды басқа біреулер сатып алды мына. Соның иелерімен сөйлесу керек.

Айнұр Әбілқасым