Мұхтар Мағауиннің АҚШ-та 9 жыл тұрған үйі мұражайға айналады

Қазақтың көрнекті жазушысы, ұлт тарихын түгендеуші ғалым Мұхтар Мағауин 2 ақпанда 85 жасқа толар еді. Осы күнге орай марқұмның Америкадағы шаңырағында ұлы қаламгерді еске алу шарасы өтті. Мағауиндер әулеті жазушының тоғыз жыл тұрған үйін, оның 65 жылдық шығармашылық қызметін көрсететін мұражайға айналдырмақ. Бүгін сол болашақ Мағауин мұражай-үйі таныстырылды. Меншікті тілшіміз Жалғас Сәдібекұлы толықтырсын.

Әдебиет зерттеушісін еске алу шарасына АҚШ-тың алыс-жақын штаттарымен қатар Қазақстаннан да оқырмандары және дипломаттар мен диаспора өкілдері келді. Жазушының шығармашылыққа толық соңғы тоғыз жылы осы кабинетте, мына үстел басында өтті. Ұлы Едіге Мағауин заңғар тұлғаның шығармашылығына қатысты тың да қызықты деректермен бөлісті. Ең маңызды жәдігер қаламгердің 23 жасынан бергі серігі болған мына машинка. «Шыңғыс хан», «Алтын Орда» секілді сүбелі туындыларын осы машинкада өзі қолымен басып шыққан.

Жазушы өмірлік миссиясын анық білген адам. 65 жылдық шығармашылық ғұмырында жазған және жазуы тиіс дүниелерін 25 жасында жоспарлап, алтын дәптеріне енгізіп қойған. Едіге Мағауин сондай ақ әкесінің төрт кезеңнен тұратын көркем шығармаларды жазу тәсілін де көрсетті.

Вашингтон маңындағы Күмісбұлақ деген жердегі бұл үйде жазушының өмір бойы жинаған кемі 4,5 мың дана болатын кітап қоры мен бүкіл мұрағаты сақталған. Сондықтан ұрпақтары осы шаңырақты Мағауин мәдени ағарту орталығына айналдыруды жоспарлап отыр.

Соңғы күндеріне дейін жазуын тоқтатпаған қаламгер шығармаларына қатысты бірқатар тапсырма беріп кеткен. Соның бірі шығармалар жинағының 27-ші томын және тарихи романдарынан құрылған 6 томдық Еуразия тарихын шығаруды аманаттаған.

Жалғас Сәдібекұлы