Ақтөбе облысында әкімдік қызметкері 672 млн теңге жымқырған

Ақтөбе облысында әкімдік қызметкері сыбайластарымен бірге 672 миллион теңге жымқырды деген күдікке ілінді. Мұғалжар аудандық құрылыс бөлімінің басшысы мен аудандық мәслихат депутаттарына қатысты сотқа дейінгі тергеу аяқталды. Оларға үй кезегінде тұрған әлеуметтік осал топқа жататын азаматтарға баспана алуға бөлінген ақшаны қалталарына басты деген айып тағылып отыр. Белгілісі – 672 миллион теңге 70 пәтерлі жатақхананы сатып алуға бөлінген. Күдіктілерге қатысты қамауда ұстау және үй қамағына алу түріндегі бұлтартпау шараларына санкция берілген. Тергеу барысында шығынның жартысынан көбі олардың өз еріктерімен кері қайтарылды.

Данияр Бегайдаров, Сыбайлас жемқорлыққа қарсы іс-қимыл агенттігінің ресми өкілі:

Тергеу аясында күдіктілердің 640 млн теңгеден астам сомаға ақшалай қаражаты мен түрлі мүлкіне тыйым салынды. Бұдан басқа тергеу барысында 359 млн теңге сомасында материалдық залал өз еркімен ішінара өтелді.

Қылмыстық процестік кодекстің 201-бабына сәйкес өзге ақпарат жария етуге жатпайды.

Жақсыбек Кемал