Екібастұзда төбесі опырылған сауда орталығы жабылды

Екібастұзда сауда орталығында болған апатқа қатысты тексеру басталды. Кеше кешкісін қаладағы ең ірі сауда орталығының аспалы төбесі опырылып, ғимарат ішінен мыңға тарта адам сыртқа шығарылды.

Апат кезінде 5 адам түрлі дене жарақатын алған. Олар Екібастұз қалалық ауруханасының қабылдау бөліміне өздері жүгінген. Жарақат алғандарға амбулаториялық ем тағайындады.

 «Maxi Mall» сауда орталығы 4 қабатты. Аумағы - 28 мың шаршы метр. Бірнеше дәмхана, мейрамхана, банк филиалы, кинотеатр бар. Сондықтан жексенбі күні орталыққа адам көп жиналған.

 Алтынбек Құрмаш, куәгер:

Біз «Maxi Mall» орталығының 1-қабатында шығар есікке қарай келе жатқанда адамдар жүгіре бастады. Біз ішке кіргенде бәрі құлап жатыр. Дереу сыртқа шығып кеттік.

Ойын-сауық орталығы 2007 жылдан бері жұмыс істеп тұр. Екі жыл бұрын киім сататын дүкенінде өрт шыққан болатын. Ғимаратқа қатысты басқа шағым жоқ. Төтенше жағдайлар департаментінің өкілдері техникалық сараптама жасау үшін сауда үйі жабылғанын хабарлады. Опырылған жердің аумағы шамамен 150 шаршы метр.

Болат Аманбай