Жайық суының деңгейі алты метрге дейін көтеріледі

Жайық деңгейі Орал тұсында 6 метрге дейін көтерілуі ықтимал. Орынбор облысында Ресей мен Қазақстан тарапы көктемгі су тасқынына қатысты бірлескен іс-қимыл жоспарын талқылады. Қазір трансшекаралық өзен қалыпты ағып жатыр. Иреклі су қоймасынан секундына 108 текше метр су жіберілуде. Бос сыйымдылығы – 700 млн текше метр. Яғни тасқын кезінде су қоймасы млрд текше метрге дейінгі суды еркін қабылдай алады. Талқылау барысында қос тарап Ирекліден жіберілетін су көлемін секундына 130 текше метрге дейін ұлғайтуды уағдаласты. Бұдан келер қауіп жоқ. Қайта мол су ауыл шаруашылығының дамуына серпін береді. Өңірдегі Киров-Шежін, Жайық-Көшім су жүйелері ризыққа толады. Жайықты жағалай 87 елдімекен орналасқан. Онда облыс халқының 75 пайызы тұрып жатыр.

Андрей Вязиков, РФ Орынбор облысының табиғи ресурстар, экология және меншік қатынастары министрінің міндетін атқарушы:

Былтырғы тасқында қазақстандық әріптестермен байланысымыз беки түсті. Қазір ақпарат алмасу белсенді жүріп жатыр. Жағдай қалыпты. Биылғы су тасқынының былтырғыдай жойқын салдары, зардабы болмайды деп сенеміз. Үміт бар. Екі жақтың да барлық жауапты қызметтері дайын.

Нариман Төреғалиев, Батыс Қазақстан облысының әкімі:

Бұлардың болжамы бойынша Жайық өзеніне 1-2 млрд текше метрге дейін су келеді. Су деңгейі 6-6,50 метрге дейін көтеріледі. Бізде су қоймаларын 50%-ға босатып қойдық. Көктемгі су тасқыны болған кезде өзімізде су қабылдауға мүмкіндік болсын деген бағытта.

Ардақ Мұратқызы