Кеніштегі жарылыстың нақты себебі белгісіз

Ұлытау облысындағы кеніште болған апатқа жер астындағы жарылыс себеп болған. «Қазақмыс» компаниясының басқарма төрағасы осылай деді. Дегенмен 1 500 метр тереңдікке ауадан сынама алу үшін мамандарды түсірудің өзі қауіпті болып тұр. Сондықтан дүмпудің нақты себебі әзірге белгісіз. Ертең жерасты жолдарын желдетіп, мамандар қайта түседі. Өзге де мәліметтерді Ұлытау облысынан Жандос Бақытұлы телефон арқылы жеткізбек.

Жандос Бақытұлы, тілші:

Қазір біз кеніш аумағынан Жезқазғанға қарай бет алдық. Апат орнында кәсіпорынның арнайы мамандары ғана қалды, стратегиялық нысан қатаң бақылауда. Түске дейін оқиға орнына Премьер-министрдің орынбасары Қанат Бозымбаев бастаған Үкіметтік комиссия келіп, жағдайды бағамдап, құтқарушылармен тілдесті, жиын өткізді. Қанат Бозымбаев тергеу жұмыстарын жедел әрі тыңғылықты жүргізуді және келешекте мұндай апаттарға жол бермеу үшін барлық қажетті шараларды қолға алу керектігін ескертті. Үкіметтік комиссия төрағасының сол сұқбатын тыңдасақ.

Қанат Бозымбаев, ҚР Премьер-министрінің орынбасары, үкіметтік комиссияның төрағасы:

Қазіргі біздің басты мақсатымыз - тексеру жұмыстарын тиянақты әрі сапалы жүргізу. Мұны Мемлекет басшысы тапсырып отыр. Құқық қорғаушылар тарапынан тиісті сараптамалар жүргізілуі тиіс, ал өндірістік қауіпсіздіктің сақталуы бойынша еңбек инспекторларын тарта отырып тергеу жүргізіледі. Соның нәтижесі бойынша нақты шешім қабылдаймыз.

Еске сала кетейін, құтқару жұмыстарына 85 адам, 17 техника және кинологтар тартылған болатын. Олар топырақ астынан әуелі 6 адамды, кейін жетінші кеншінің денесін алып шықты. Сараптама тағайындалды. Осы апатқа қатысты қауіпсіздік ережесін бұзу бойынша қылмыстық іс қозғалды. Ал, осыдан бірнеше сағат бұрын Ұлытау облысы мен Қарағандыдан көмекке келген мамандар үйлеріне қайтты. Шахта бос. Тергеу жұмыстары бірнеше күнге жалғаспақ.

Жандос Бақытұлы