Петропавлда кәріз коллекторын жөндеу кезінде жарылыс болды

Петропавлда кәріз коллекторын жөндеу кезінде құбырда жиналған газға ұшқын тиіп, салдарынан жарылыс болды. 5 адам жарақат алып, төртеуі ауруханада жатыр. Жұмысшылардың бетін күйік шалған. Нысан қала тұрғындарын тіршілік нәрімен қамтып отырған «Қызылжар су» коммуналдық мекемесіне тиесілі.

Бауыржан Ыбыраевтың бетін күйік шалған. Өзі көз жанарының зақымданбағанына шүкіршілік етеді. Коммуналдық мекемеде 10 жылдан бері жұмыс істеп жүр. Тәжірибелі маман бұрын-соңды мұндай жағдай болмағанын айтады.

Бауыржан Ыбыраев, «Қызылжар су» мекемесінің жұмысшысы:

Кәріз құдығында жұмыс істеп жатқанда газ шығып, сол жарылды. Құдықтың ішінде құбыр бар, қиратып жатқанда содан ұшқын шықты. Екі құбырдың арасында газ бар екен, біз оны су деп ойладық.

Жарақат алған бес адамды жедел-жәрдем қызметі бірден ауруханаға жеткізіпті. Алғашқы медициналық көмек көрсетілгеннен кейін жұмысшылардың біреуі үйіне жіберілген.

Қайрат Мәжитов, дәрігер:

Науқастардың жағдайы тұрақты. Алған жарақаттары орташа ауыр деңгейде. Бір адамның құлағын, қалған төртеуінің бетін 1-2 деңгейдегі термиялық күйік шалған. Қажетті ем шаралары жасалып жатыр.

«Қызылжар су» мекемесінің басшылығы құбыр ауыстыру барысында қауіпсіздік талаптары сақталғанын айтып отыр. Жұмысшылар арнайы құрылғының көмегімен құдықтағы ауа құрамы талапқа сай екеніне көз жеткізген соң, төменге түскен.

Жеңіс Сұлтанов, «Қызылжар су» мекемесінің директоры:

Дәрі-дәрмек, керегін апарып тұрмыз. Заңгерлер қарап, қолымыздан келгенін жасаймыз. Олар ақшасыз қалмайды, көмексіз қалмайды. Табысын біз сақтап қаламыз деп ойлаймыз.

Еңбекті қорғау қағидаларын бұзу дерегі бойынша қылмыстық іс қозғалып, сотқа дейінгі тергеу шаралары басталды.

Эльмира Кәленова, тілші:

Оқиға дәл осы жерде болған. Коммуналдық кәсіпорын өкілдерінің айтуынша жұмысшылардың бірі 9 метр тереңдікте жарты сағат бойы жұмыс істеген. Ол дін-аман. Жарақат алған адамдардың бесеуі де құдықтың сыртында болған.

Элмира Кәленова