Этнос өкілдерінің ел дамуына қосқан үлесі зор

Дәл қазір Шымкентте бүгінгі мерекеге орай «Достық үйінің» алдында өндірістік бұйымдардың көрмесі өтіп жатыр. Оған мегаполистегі түрлі ұлт өкілдері ашқан, бүгінгі таңда тұрақты жұмыс істеп келе жатқан түрлі кәсіпорындардың өнімдері шығарылған.

Бүгінгі таңда Шымкент қаласы экономикасының 56 пайызы шағын және орта кәсіпкерліктің арқасында дамып келе жатса, бұл салаға шаһардағы түрлі этнос өкілдерінің де қосқан үлесі мол. Бүгінгі шарада олар басқаратын көрмеге 10-нан астам кәсіпорынның өнімдері қойылған. Оның ішінде тоқыма бұйымдары, аяқкиім, сүт өнімдері, сусындар, пластикалық ойыншықтар, тіпті жиһазға дейін бар. Бұл өнімдердің бірқатары ішкі нарықпен қатар сыртқа да экспортталады.

Шаһар жұртшылығы жаңа ғана бүгінгі мерекеге орай жолға шыққан «Алғыс» керуенін күтіп алды. Қазақ еліне мың алғыс монументі жанында сахналық көрініс қойылып, алғыс қоржыны табысталды. Сәлден соң салтанатты форум басталады. Онда этномәдени бірлестіктердің бірлік пен келісім жолындағы тарихи танымдық істері сөз болмақ. Жалпы Қазақстан халқы Ассамблеясының 30 жылдық мерейтойына орай Шымкентте жыл бойына 100-ге жуық мәдени көпшілік шара өтеді. Сондай-ақ этномәдени бірлестіктердің бастамасымен 30 қайырымды іс атқарылады.

Ғани Қалмаханов