ШҚО-да өндіріс саласында жазатайым жағдай азаймай тұр

Шығыс Қазақстан облысында тау-кен, өндіріс және құрылыс саласында жазатайым жағдай азаймай тұр. Былтыр 17 адам көз жұмып, 66 жұмысшы ауыр жарақат алған. Бұл алдыңғы жылмен салыстырғанда 8 пайызға көп. 2024 жылы еңбек инспекторлары өңірдегі жалпы кәсіпорындарға 405 рет тексеріс жүргізген. Оған қоса жұмысшылар тарпынан түскен 2 мыңға жуық арыз-шағымды қарап, нәтижесінде 1 322 заң бұзушылық анықталған. Оның басым бөлігі еңбек қатынасы мен қауіпсіздік ережесіне қатысты заң бұзушылық. Тексеріс қорытындысы бойынша 143 ұйғарым шығарылып 35 миллион теңге айыппұл салынған.

Бақытбек Қизатов, ШҚО мемлекеттік еңбек инспекциясы департаментінің басшысы:

Жұмыс істейтін 1000 адамға шаққанда жазатайым оқиғалардың жиілік коэффиценті 0,36 пайызды құрады. Өндіріс салдары бойынша ең көп жарақат алғандар - тау-кен металлургия кәсіпорнында 26 адам. Бюджеттік ұйымдарда 25.

Облыста еңбекақы қарызы да азаймай тұр. Тек биыл ақпан айында 9 кәсіпорын жұмысшыларына 150 миллион теңге қарыз екені анықталды. Бұл берешектің 136 миллион теңгесі электр құралдарын шығаратын зауытқа тиесілі. Жалпы, аймақта бүгінге дейін үш жүзге жуық адам жалақысын уақытылы ала алмай жүр.

Олжас Керейхан