Экстремалды жүгіру марафоны кезінде 25 жастағы әуесқой спортшы Дәулет Бейсенбаев көз жұмды

Алматыда экстремалды жарысқа қатысқан азамат қайтыс болды. Жедел-жәрдем дәрігерлері сол маңда болғанымен, спортшы Дәулет Бейсембаевтың өмірін сақтап қала алмады.

Қалада жарыстың бұл түрі 2017 жылдан бері ұйымдастырылып келеді.  Бұған дейін адам өлімі тіркелмеген. Жалпы сайысқа қатысушылар 4 шақырымға жуық жолда 24 кедергіден өтуі керек болған. Алайда Дәулет Бейсембаев өзін жайсыз сезініп, қарсыластарына тартысты тоқтататынын айтыпты. Ол жарысқа дейін дәрігерлердің тексерулерінен өтіп, қатысуға рұқсат алған екен. Тіпті  «Өміріме қауіп төнсе, ешкімге кінәламаймын», - деп қолхат та жазып кеткен. Ұйымдастырушылардың сөзінше, ол кісінің өліміне нақты не себеп болғаны әзірге белгісіз. Олар марқұмның отбасына көңіл айтып, қаржылай көмек көрсеткен. 

Эльмира Эзями, жарыс ұйымдастырушысы:

Жарысты өткізуге ауа райы қолайлы болды. Спортшыларға барлық жағдай жасалды. Мен сол күні оларға нөмірлерін беріп, барлығын өзім қадағаладым. Дәулеттің де көңіл-күйі өте жақсы еді. 25 жасқа енді ғана толған бозбала аяқ астынан қаза тапты. Бұл қайғылы жағдай барлығымыздың қабырғамызды қайыстырды. Біз оның отбасына барынша көмек көрсетуге тырысамыз.

Нұрхан НҰРЛАНҰЛЫ